Thitumh nak

Thitumh hi i fukfanh, tlikzaam le phungning thitumh tiin asi. Khrifa chan ahcun Khrifaphung in lehthah asi. A fukfanhmi hi i duh ngai tung i phungning in  thitumh ah chawva le dih heu a chei lomi an si deuh. Hi ah cun rak muikhum vial in tlam a tling kho. Tefa ngeih hnu pi ah arsathah khawh asi ko. Tlikzaam cu nu le pa nih khenkham mi an si deuh.

Phungning i thitumh ahhin..hawi hlan bik ah taitipurh hmasa asi tawn. Cucu pa leikap nih nu lei lungthin rak del chungnak asi. Hal hna sih law an lung zeidah a lawh hnga tiin rak thlingthlak chung asi. Nu lei lung a tha pah ko ti an theih ahcun halpi an ti i lamkal fial an si. Nu lei chung an hna a tlak ve ahcun tlakzu an dah, vok an rak thah hna. Pa lei nih innkai chiah asi i ham ciami tinak asi. Nupi hal biaruah lio i voih ceh cu a tha lo, pangmatnak asi anti. Cuhnu cun manrel le puai kong  ceih asi. Tluang le tluang i thitumh ahcun pa chung nih tluninn ah an i hmanmi inn cu cheh-inn an ti. A neinung nih cun an fanu le cu an inn in pa inn tiang puan phah cung in an kal ter hna i cucu puanparphah anti. Nulei chung nih an thahmi paoh cu fanu-ah ti asi. Puai sathahmi chung in nupi hal i a kalmi cu sakhua pek ansi i lamkalsa an ti. Pa nih a neihchiah dih in man tampi a man tawn caah nupi thit le samhri phoih ti phung an thluk. Nu lei zong nih an fanu cu hlawn thil tampi an kalh ve caah man le rul ti a si ve. An i umh hnu ah arnak-hmanh timi phunhrawmhnak an tuah i nu cu pa phun a hrawm cang. Cuticun hmunkhat ah khua an sa.

Then: kir, maak, sumlaitan(nun tian) le thih tian tiin aum. Nu nih a va cung ah a lung a dongh tuk ahcun kir khawh asi. Pa nih man an rak manh mi vialte khirh a sive. Man khirh awk ngeih lo ruang ah duhlo bu in va sin a benhmi an rak tampi. Nupi kir le sal lei tlak ti phung zong an thluk phah. Pa nih an nu kha a lung a dongh tuk ahcun maak khawh asi. Cutik ah nu cu a ta-pa nih an rak muikhum tawn. Nu le va i duh ngai ko bu in tefa ngeih khawh lo ruang ah an pahnih lungtling tein i then khi sumlaitan an ti. An ngeihmi vialte hnarcheu veve in an i then. An i duh tuk bu tein tianbuh an erh i an rak i then ko. I sikhuat i thinhan tuk ruang ah nu nih a ta-pa sin i a va kal khi khuatlik siloah thinchiat rolh an ti. I duh cukmak lio ah thihnak nih athenmi hna cu i thihtian asi. A faak tuk. Nuhmei le pahmei an hung si ko. An fale cu ngahtah an si. Va cungpa duh hi sual faak tuk ah ruah asi. Pa cu innlak nupi a ngei zong an um. Nupi ahhin nutak, nuchun, nutlai, nunawn, innlak nupi an um.

Nungak tlangval saupi vangei lo, nupi ngeilo in a um mi khi lengtul, valtul ti an si. Nupi, va he i then hnu ah a nungak, a tlangval thanmi cu lengleh le valleh ti an si.