Thihloh ton kong

Thih le Loh: Thih hi phun hnih thum pi in an then. An i tuammaui ning le an i fim tawl ning zong aa dang.

1. Pul thih:  Rai pa khatkhat ruang in a zawfak i a thimi khi pul thi ti an si. Hlan ahcun inn tual tlang hna ah rak i vui. Thlanmual theng an rak ngei lo.

2. Saar thih: Ti,mei, tingkung, sahrang, methal, ral kut...ti bantuk in ruah lo in a thi mi khi sar thi ti an si.(tu chan cun eccident) Saar thih in a thimi hi saar thlan timi hmun, hau leng ah vui an si. Khuachung ah vui phung an si lo.

3. Hring thih: Hliam a tuar i saupi kuah le thlop hnu ah a thimi, chungril faak in a kuah i tlum dih hnu le zor dih hnu ah a thimi khi hring thi ti an si. Pul thi bantuk in i fimhlawm asi ve.

4. Thih-chia: Thinghmui hma in thih khi thih chia ti asi. An nih cu thinghmui an si ti theih bak in hau leeng ah chuah(haak) an rak si. An nun lio te in thlan an cawh piak hna i an thlan pawng ah chawl buk an sual piak hna. Cuka ahcun an chiah hna i chungkhat nih ni khat ah voi khat tibantuk in an va veh hna. A thi cang hnga maw? ti i va bih duak khi asi.  An thih tik ah cawh ciami thlan ahcun an thlak colh ko hna. Hihi hmunchia ti asi i a pawngkam kal le theih va lawh hmanh an rak hrial.

5. Naucung thih: Nu nih fa a hrinnak in a thih khi asi.  Min ngeih hlan i a thimi fale paoh cu a tlawt-tlau an ti i um-rua chung ah an sanh hna i tungkhur hram maw, dum chung ah maw an fimthlawm ko hna. A thaizing cu lai-car ulh ti asi.

Thihloh an ton tik ah khuapi tein ruakhumh asi. Cubantuk thawng thanh tucu zualko ti an si. Khua chingchan zong thawng i thanh asi i ruak humh ah an ra ve. Mi thi chung khar caah thi-hnem rawl zong pek an si i khual ruakhum caah chuncaw rawl zong inn kip nih i damh asi. Thlanco caah thlanco rawl zong tuah asi. Ruak ni ah ruak hngah asi fawn. Ruak vui tik ah mithi nih an rak ngeihmi thil mansung le a duhmi pawl an thlak chih. Cucu thih-thlak ti asi. Ruak vui a thaizing cu thlanpho ulh ti asi i inn ah um dih asi. Tlanser zong aum. Cun lungdonh nih a zulh. A ti kho nih cun pa caah laamserh le pualthawh, nu caah tikal zong tuah piak an si.

Thlan cu kawleih(chanthar kan hmanmi phun hi), thlanker, lungkor le thlanpi tiin a um. Thlanker le lungkor cu tuchan ah kan hmang theng ti lo. Thlanpi cu chungkhar thlan ti zong in ti asi.

Mithi thlarau:

Saarthih in a thimi hna cu an thihnak hmun ah an thlarau a taang tiah an zumh caah thlakawh timi a um. Tla a ko tu hi inn a phak hlan ah holh phung asi lo. A holh ahcun thla a kir than an ti.

Mithi khua a um tiah an zumh. Thlarau cu mithi khua ah minung kan khuasak bantuk te hin khua an sa ve. An thih khin an thlarau cu mithi khua lei ah a kal. Sanu buantuan an phak ah sanu timi nih a rak chek hna. Sanu hi khualuhnak nawl ngeitu si dawh asi. Thlan i an thlakmi hna cu mithi khua ah an thil ngeihmi a va si beh ko. An ruakhngahnak i an thahmi sa vialte, cun an nun lio i an kahmi sa vialte nih an zulh hna tiah an zumh fawn.