Sakah le ramvaih

Vom, ngal, cakei, sai, le fung hna hi sahraang(sapi puam) ah an chiah. Hi pawl kah ahcun sa-sawntuk asi. Cakei kah ko hi an sunhsak khun. Cakei fim zong a um. Sahraang a kap mi cu pasal tha ah ruah ansi. An hla kip le an minsak ah an sahrang kah kong a cuang peng. Khuaingal zong sahrang asi anti. Sai le fung cu tuchan ahcun Lairam ah an um ti rua lo. Sa kah hmasat bik khi kutseh anti. Kutseh i sapi puam kah cu a tha lo an ti fawn. Salu nih mi a suun i an chan a tawi an ti. Sa dang pawl cu: sazuk (zukneng) saza (zatum), sathar, sakhi pawl hi pangtar mi sa an si. Cun; zawng, ngau, sakuh, vawrvok, sa-ui, cenghngia,...pawl hi pangtar lo sa an ti. Hlan ahcun an kahmi salu hi innleeng vaampang ah ruang te in an taar tawn. Khuaingal thlar le vakok lu zong an taar tawn.

Ramsa cu li le thal, kharkhep, tlak, sathang, mangkhawng le meithal in an thah tawn hna. Pa nih ram vaih le ramriah cu an huam i nu cu ngahhring dawi asi. Sapi puam an kah ahcun hauka in zaido(vawhla) an vawrh i thang an thlah(meithal an puah). Khuami nih zuhui, zureu , fu le banhla le bongbong chengcheng he tiah an rak don hna. Sa cu a pum in an tlunh. Khuapi tein tlangzamh asi. Sahrang tuah a rak si. A kaptu nih cun a lu fangfang a co ko. Sahrang timi cu nifar sataw, pu i, thaltuan saliang(a kah mi sa a rak nolh tu), meithal savang(mi meithal hlanmi in kah ahcun), kawi hngawng hna hi an si.