Innsak ning

Pipu hna inn sak ning le an rak hmanmi thingrua hi chanthar mino nih cun hmuh awk a um tuk ti lo. A theih zong kan thei kho theng ti lai lo. Inn le lo an rianhnak ah hin an nundawh le an lungput tampi hmuh khawh asi. Hlan lio Lai-inn a hmet ngan cu lam in tah asi. Mi thawngtha nih cun lam kua lam hra in an rak sak. Tualbawk, saihrem bawk te i a um mi zong an rak um ve. Innsaknak thingrua hna cu; sutpi, inntung, dophit, hri, pom(kal), vaam, vaamtlang, thlung, liang, kaan, intling, hrehpi, hrehnamh, ngaidi, le tlah ansi. Thirkhen an rak hmang lo. Hluah le sobul zong an rak hmang bal lo. Zelpi le vaam an chonmi thing pawl zong hi laihrei tein an rak cheu i an rak themhmi an si. Zelpi cu khap li khap nga hna an kau i lam li lam nga an sau. Thingtum pakhat khi zel tlap hnih maw tlap thum maw, ah an rak chuah.

Inn ah hin; innpi, pokhlet, innleeng, sangsang, thinthang, donhhlei, tumbut, ti hna an um. Thlalang-awng an ngei lo. Innchung a hnulei ah caarchuah timi aum i umpu le thilri dang tete an chiah. Cuka ahcun zumput zong a um i kawm tang vokpi farual nih tuanvo a rak lak. Innleng ah hin an ngeihmi tirawl cu buk le haan in an chiah. Thilmansung zong bukbau in innleng ah an chiah. Meithal zong innleeng kaanphir cung ah an khan ko. Innleeng vaam ah sakap nih salu an taar. Tumbut ah sum an su. Inntang ah vok le satil an zuat. Pokhlet ah tikuang an hun. Innpi chung ahhin tappi le lungthu a um. Tappi cung ah meicung zong a um i fur ah faang an hngat i tihthing zong an chiah tawn. Sa zong meicung ah pherh asi. Meicung nih a fimhlawm ngaingai hna. Mi he mah he innchung um ah cun tappi hram ah thut asi. Zan ih zong ah chakchang in meiphu an hawr tawn.

Inn an rianh tik ah hin an rak i zuanhnawh. Thingrua zalh vialte zong i bawmh a rak si. Hlawhphal timi a um bal lo. Mipeem an ngeih ahcun khuapi nih bawk an tomh hna i thingsei an ngalh hna. Innkang meitet an um sual zong ah khuapi tein i zuan hnawh i, bawk tomh le, a herhmi umkheng le tirawl zong rak thenh-pek cio an si. An i ziaphel bal lo.

Sutpi kong hi vun peh ta ning. Sutpi cu an biapit ter tuk. Inn an sak tik ah sutpi hi bunh hmasa bik asi. Tungkhur an cawh dih hnu ah arhli sen an thah i a hngawng an cik hnu ah a thi cu tungkhur chung ah an thlor. Sutpi zong ahcun an theh. Cuhnu ah thla an cam i sutpi cu an bunh. An inn cu ti le mei in a himnak hnga, hrinnu sorpa an ngeihnk hnga, vok keuh ar keuh an ngeih nak hnga, satil an pun karh nak hnga, an ngan a dam nak hnga...thluachuah phunphun an hal.Tuchan i innkil lung chiah bantuk hi asi ve ko. Mi dang pakhat khat nih mi sutpi a va pom ahcun nan sal ka si ti khing khi asi cang. Tahchunhnak ah, mi pakhat nih lai a nawn sual. Phuhlam i thah ding a tih caah pachuak tha chungkhar an sutpi a va pom ahcun cu han chung nih cun an rak runven cang lai. An sal a si ve lai.