Timit Vakuang

Timit Vakuang

Hakha, Thantlang ummi a tam u nih cun Timit va cu kan theih ngawt lai dah. A tiva kuang cu hme hmanh sehlaw hla cuang minthang tiva pakhat a si ve. Zinghmuh tlang hram in aa sem i Bawinu va ah a va fon mi a si. A hme ko nain zeiruang ahdah hla cuang le chimphai dai loasi hnga ti hi ruah phu te a si.

Timit vakuang hrawn ah hin far thing tampi an kho i inn saknak ah kan hman. Inn-lo rianhnak ah a kan thathnem hringhran. Cun, nel rawn tha tete zong a ser caah chungkhar tampi kan paw a kan cawmtu zong a si fawn. Rawl lawng asi lo meh zong asi chih. Vitamin a tha tukmi ngasa, cang-ai le kingkuar pin ah tisik an-hnah zong a kan rin.

Hi pin ah, pipu chan in nihin kan chan tiang lungnuamhnak a kan pe bik tu a si. Lai lei ngaknu tlangval kan i nuamh bik nak cu tlangkai le tium ngahring dawi hi a si. Ram dang bang biscope va zoh awk le nuamhnak dangdang va tuah awk kan ngeih lo ca zong ah a rak si men ko lai. Sinain hi hna hi um hmanh hna sehlaw ngahring dawi le tlangkai cu an laan kho lai ka zum lo. Zeicahtiah mino nih kan nunphung bantuk in kan i ruah cang. Kawl ralkap pen hnu cun kan Ruangtlang belte tlerhtlawh ngam ding a si ti lo. Ccucaah khua a hung pau cun Timit lei lawng te panh a si cang. Hawikom rual, riantuan ti hawi, chungkhar, BYF, Sunday School, Singinn class,...tiin a phuphu in Timit ah choi dih a si. Tiva kuang nih a kan tlum lo caan zong a um. Lung va phawh i nga va tlaih theng khi kal hnawhmi a si lo. Nuamh bak a si ko. Ummmm...A nuam ve hrim ko.

Timit va hi kan dawt ding asi. Kan caah tiva nung asi. Lawmhnak bia va chim zong ah a thei lai lo. A kan thathnemnak hi kan theih a herh. Amithmai kan zoh ve a herh. Kan zohkhenh le kan kil ven a herh. Cuti kan dawt ahcun hmailei chan ah atu a kan thathnem mi nak let tampi in a kan thathnem rih lai.

Timit va nih a kan cawnpiak ve. Mi dang caah nuamhnaak le lawmhnak phurtu si ding. Rawltammi khim tertu le tihal mi an tihal riamh tertu si ding.